বিষ্ণু ৰাভা দিৱস

বিষ্ণু ৰাভা দিৱস বিষ্ণুপ্ৰসাদ ৰাভাৰ মৃত্যুৰ দিনটো অসমত ‘বিষ্ণু ৰাভা দিৱস’ হিচাপে পালন কৰা হয়। প্ৰত্যেক বছৰৰ ২০ জুন তাৰিখে এই দিনটো চৰকাৰী কাৰ্যসূচী হিচাপে শিক্ষানুষ্ঠানসমূহৰ লগতে অসমৰ সামাজিক-সাংস্কৃতিক অনুষ্ঠানসমূহে উলহ-মালহেৰে পালন কৰি আহিছে।

ইউনাইটেড্ কেকুৰী আদৰ্শ হাইস্কুলত বিষ্ণুৰাভা দিৱস উদযাপন।

বিৱৰণ

১৯৬৯ চনৰ ২০ জুনত বিষ্ণুপ্ৰসাদ ৰাভাৰ তেজপুৰ জিলাত দেহাৱসান ঘটে৷ তেখেতৰ সামাজিক-সাংস্কৃতিক অৱদান আৰু উত্তৰাধিকাৰে নৱ প্ৰজন্মক অনুপ্ৰাণিত কৰি আহিছে। জন্ম বাৰ্ষিকীত পালন কৰা বিষ্ণুপ্ৰসাদ ৰাভা দিৱসত অসমৰ সাংস্কৃতিক আৰু সামাজিক তন্ত্ৰলৈ তেখেতৰ অপৰিসীম অৱদানৰ প্ৰতি শ্ৰদ্ধা জনাই শ্ৰদ্ধাঞ্জলি প্ৰদান কৰা হয় আৰু তেখেতৰ গুণানুকীৰ্তন কৰা হয়। এই দিনটোত তেখেতৰ জীৱন উদযাপন আৰু তেখেতৰ কৃতিত্বক সন্মান জনাই বিভিন্ন সাংস্কৃতিক অনুষ্ঠান, সংগীত পৰিবেশন, আলোচনা চক্ৰৰ আয়োজন কৰা হয়। তেখেতৰ দৃষ্টিভংগী, নিষ্ঠা, অসমীয়া সংস্কৃতি আৰু সমাজত চিৰস্থায়ী প্ৰভাৱ স্মৰণ কৰাৰ এক অনুষ্ঠান হিচাপে অসমত এই দিৱসটো প্ৰতিবছৰে উদযাপন কৰা হৈ আহিছে৷

বিষ্ণু প্ৰসাদ ৰাভাৰ চমূ পৰিচয়

বিষ্ণু প্ৰসাদ ৰাভাৰ চমু পৰিচয় :বিষ্ণু প্ৰসাদ ৰাভাৰ জন্ম হৈছিল ১৯০৯ চনৰ ৩১ জানুৱাৰীত ।দেউতাকৰ নাম গোপাল ৰাভা আৰু মাতৃ গেঠিবালা ৰাভা । বিষ্ণু ৰাভাৰ তিনি গৰাকী পত্নী -প্ৰিয়বালা ৰাভা, কনকলতা মেধি আৰু মোহিনীবালা বসুমতাৰী ।সন্তান তিনিটা-পৃথ্বিৰাজ ৰাভা, হেমৰাজ ৰাভা আৰু মেণ্ডেলা ৰাভা । ১৯৬৯ চনৰ ২০ জুন তাৰিখে কৰ্কট ৰোগত আক্ৰান্ত হৈ বিষ্ণু ৰাভাৰ মৃত্যু হয় ।

বিষ্ণু ৰাভা দিৱসৰ প্ৰাসঙ্গিকতা

বৰ্তমান বাংলাদেশৰ ঢাকাত জন্মগ্ৰহণ কৰা বিষ্ণু প্ৰসাদ ৰাভাই সমগ্ৰ জীৱন অসম আৰু অসমীয়াৰ বাবে দি থৈ গ'ল । প্ৰাথমিক শিক্ষা বাংলাদেশতে গ্ৰহণ কৰি হাইস্কুলীয়া শিক্ষাৰ বাবে তেজপুৰলৈ আহে আৰু পিছত কোচবিহাৰ আৰু কলিকতা(কলকাতা)ত উচ্চ শিক্ষা গ্ৰহণ কৰে । বিষ্ণু প্ৰসাদ ৰাভা এগৰাকী প্ৰতিভাশালী আৰু তীক্ষ্ণ-বুদ্ধি সম্পূৰ্ণ ব্যক্তি আছিল । তেখেত একেধাৰে কবি, গীতিকাৰ,নাট্যকাৰ,গল্পকাৰ ,নিবন্ধকাৰ,জীৱনীকাৰ,নৃতত্ত্ববিদ বোলছবিকাৰক আৰু উপন্যাসিক ।মহাপুৰুষ শ্ৰীমন্ত শংকৰদেৱৰ চিত্ৰ আৰু ' বাঁহী ' আলোচনীৰ বেটু-পাতৰ সাতখলপীয়া সিংহাসনৰ ছৱি বিষ্ণুৰাভাই অংকন কৰা । বিষ্ণু ৰাভাৰ অসমীয়া, বাংলা,বড়ো, হিন্দী, ইংৰাজী আদি কৰি কেইবাটাও ভাষাৰ দখল আছিল ।তেখেতে ঢোল, খোল, মৃদং,পেঁপা, টোকাৰী আদি বাদ্য যন্ত্ৰ বজাব জানিছিল । ১৯৪০ চনত কাশী হিন্দু বিশ্ব বিদ্যালয়ত বিষ্ণু ৰাভাই পৰিৱেশন কৰা শিৱৰ তাণ্ডৱ নৃত্য, ওজা-পালি আৰু কালীয় দমন নৃত্য দেখি সেই সময়ৰ কাশী হিন্দু বিশ্ব বিদ্যালয়ৰ উপাচাৰ্য সৰ্বপল্লী ৰাধাকৃষ্ণণ মুগ্ধ হৈছিল আৰু বিষ্ণু ৰাভাক ভূয়সী প্ৰশংসা কৰি কলাগুৰু উপাধি প্ৰদান কৰিছিল ।

বিষ্ণু প্ৰসাদ ৰাভা অসমীয়া সমাজ জীৱনৰ প্ৰতীক । জৰ্জৰিত অসমীয়া সমাজ ব্যৱস্তাৰ বিপৰীতে যি সামাজিক জীৱনৰ ছৱি বিষ্ণু ৰাভাই সংগীত, ছৱি,সাহিত্যৰ মাজেৰে অংকন কৰি থৈ গ'ল সি অতুলনীয় । বিষ্ণু ৰাভা গণ শিল্পী আছিল । অসমৰ পাহাৰ-ভৈয়াম একাকাৰ কৰি ঘুৰি ফুৰিছিল ।নিস্পেষিত, শোষিত জনগণৰ হৈ সদায়ে যুঁজিছিল। বিপ্লৱী আছিল ।২০ জুন তাৰিখে বিষ্ণু ৰাভা দিবস উদযাপন কৰি বিষ্ণু ৰাভাৰ চিন্তাধাৰা, আদৰ্শ আৰু দৰ্শন নতুন প্ৰজন্মক চিনাকী কৰাই দিয়াটো সময়ৰ আহবান । ভূপেন হাজৰিকাৰ ভাষাৰে-"বিষ্ণুদা ঘূৰি আহিবা -আকৌ আমি বিষ্ণুদাক আদৰিম-সাবটিম-অনুসৰণ কৰিম-বিষ্ণুদাতো এজন মানুহ নহয়-বিষ্ণুদা এটি সদা জীৱন্ত জীৱন-লালসা -।"

বাহ্যিক সংযোগ

অসমীয়া প্ৰতিদিনৰ বাতৰি